Учурда кыргызстандык спортчулар Парижде өтүп жаткан Олимпиада оюндарына катышууда. Команданын эсебинде 4 медаль бар: 1 күмүш жана 3 коло. Ошондой эле боксчу Мунарбек Сейитбек уулу финалга чыкты.
Олимп шаарчасында спортчулардын тамактары кантип жатат, алар кайсы бөлмөлөргө жайгаштырылды, Кыргызстандын айрым аткаминерлери Парижге кимдин эсебинен келишти? Бул тууралуу Улуттук олимпиада комитетинин башкы катчысы Кылыч Сарбагишев комментарий бергенин «АКИспорт» жазды.
— Азыр социалдык тармакта шаарчада тамак-аш начар деп талкуулап жатышат. Бул чынбы?
— Алгачкы күндөрү Олимпиада шаарчасынын ашканасында чындап эле узун кезек пайда болгон. Уюштуруу комитети спортчулардын даттанууларын эске алып, тамактануу сандык жана сапаттык жактан жакшыртылды. Убакыттын өтүшү менен күрөш, бокс жана дзюдо боюнча бардык машыктыруучулар бул маселе боюнча маек курушту. Тренерлердин айтымында, учурда салаттар, жемиштер, мөмөлөр жана негизги тамактар жетиштүү. Олимпиада комитети спортчулар үчүн улуттук тамактар: шорпо, жаңы бышырылган эт жана тоок эти түрүндө кошумча тамак уюштурду.
— Спортчуларды жайгаштыруу боюнча суроолор болду.
— Жалпысынан Олимпиада шаарчасында 1, 2, 4 жана 6 орундуу бөлмөлөр бар. Машыктыруучулардын өтүнүчү боюнча биздин бардык спортчулар бир жана эки орундуу бөлмөлөргө жайгаштырылды.
— Федерация президенттери да бир орундуу бөлмөдө жашайбы?
— Шаарчада бир дагы федерациянын президенти же аткаминер жок. Шаарчада машыктыруучулар, спортчулар гана жашап жатышат. УОК медицина кызматкерлерине өзгөчө көңүл бурган, алар да шаарчада жайгашкан. Азыр 16 спортчуга эки массажист, эки дарыгер бар. Токиодо ушундай эле сандагы спортчулар үчүн бир дарыгер жана бир массажист болгон.
— Саламаттыкты сактоо министри Алымкадыр Бейшеналиевдин сүрөтү резонанс жаратты.
— Оюндарга меценат Аскар Салымбеков менен Саламаттыкты сактоо министри Алымкадыр Бейшеналиев өз каражаттарынын эсебинен катышууда.