Белгилүү актёр Жан-Клод Ван Дамм адам сатуу менен алектенген делген кылмыштуу топтун ишмердүүлүгүн иликтеген Румыниядагы кылмыш ишинде айыпталуучу болуп калды. Бул тууралуу «Медуза» жазды.
Маалыматка караганда, бул иш 2022-жылдан бери уланып келет. Прокуратуранын маалыматы боюнча, кылмыштуу топ жаш кыздарды (анын ичинде жашы жете электерди да) модель катары жумушка тарткан, бирок чындыгында алар психологиялык жактан мажбурлоо аркылуу сексуалдык эксплуатацияга кабылышкан.
Ван Дамм 31-мартта зомбулукка кабылган делген, азыр 26 жаштагы кыз анын үстүнөн арыз жазгандан кийин шектүү катары карала баштаган. Анын айтымында, мындан 10 жыл мурун Канн шаарында аны жана дагы төрт кызды актёрго «берип коюшкан». Ван Дамм үч берене боюнча кылмышка шектелүүдө, бирок анын өкүлдөрү комментарий берише элек.
