Япониялык яхтсмен Кэнити Хория Тынч океанын жалгыз кесип өткөн алгачкы улгайган адам болду. Бул тууралуу чет элдик басылмалар жазып чыгышты.
83 жаштагы Кэнити Хория 27-мартта 6 метрлик Suntory Mermaid III деген яхтасы менен Сан-Францискодогу порттон чыгып 8 жарым миң чакырым жүргөн. 4-июнь күнү ал Ички Япон деңизи менен Тынч океаны кошулган Хонсю жана Сикоку аралдарына келген.
«Үйгө аман-эсен жетип келгениме абдан кубандым. Мага колдоо көрсөткөн баарыңыздарга ыраазычылык», — деп билдирген Кэнити.
Маалыматка ылайык, Кэнити Хория 23 жашында да 3 ай аралыкта Тынч океанын жалгыз кесип өткөн. «Бул саякат мен үчүн чек эмес, 100 жашка чейин дагы уланта берем», — деген ал.
