Улуу Британияда биринчи жолу жатын трансплантациялоо операциясы ийгиликтүү өттү, бейтаптын 40 жаштагы эжеси донор болду. Бул тууралуу BBC News жазды.
Кош операция Оксфорддун ооруканасында жасалып, тогуз сааттан ашык убакытка созулган. Операцияны медайымдар жана анестезиологдор менен бирге сегиз хирург жасаган.
Операция болгон аял сейрек кездешүүчү Майер-Рокитанский-Кустер-Хаузер синдрому менен төрөлгөн, анын кесепетинен кыздардын жыныс кынынын өнүкпөгөнү жана жатыны начар өнүккөн же такыр жок, ал эми энелик бездери бүтүн жана нормалдуу иштейт.
Бейтаптын улуу эжеси буга чейин эки баланы тарбиялап, мындан ары төрөбөөнү чечкен. Эми сиңдиси да төрөй алат, бирок төрөт кесарево жолу менен гана болот.
