Кечээ, 2-мартта Америка Кошмо Штаттарынан кийин Евробиримдик да Орусиянын оппозиционери Алексей Навальныйды ууландыруу окуясынын артында Орусиянын Федералдык коопсуздук кызматынын өкүлдөрү турган деген негиз менен Орусиядагы бир нече чиновникке санкция жарыялады. Бул тууралуу чет элдик басылмалар жазып чыгышты.
Маалыматка ылайык, Евробиримдик Орусиянын Башкы прокурору Игорь Краснов, Тергөө комитетинин башчысы Александр Бастрыкин, Жаза аткаруу федералдык кызматынын башчысы Александр Калашников жана Орусгвардиянын командири Виктор Золотовго чектөөлөр коюп, санкциялардын тизмесине киргизген.
Ал эми Орусиянын Тышкы иштер министри Сергей Лавров алардын мындай кадамдарына Москва жооп кайтарат деп билдирген.
Белгилей кетсек, Орусиянын оппозиционери Алексей Навальный өткөн жылдын 20-августунда Томскиден Москвага баратканда эс-учун жоготуп, ошондон кийин Германиянын клиникаларынын биринде 19 күндөн кийин гана көзүн ачкан. Анда германиянын дарыгерлери Навальный «Новичок» тобуна кирген зат менен ууландырылганын аныкташкан. Ал эми 17-январда ал Германиядан айыгып, мекенине келгенден кийин камакка алынган. Москва соту анын камалышын мыйзамдуу деп таап, 3 жарым жылдык абак жазасына которуу чечимин чыгарган.
