Кытай өкмөтү менен байланышы бар деп шектелген хакерлер АКШнын Каржы министрлигинин компьютердик тутумдарын бузушкан. Бул тууралуу АКШнын атын атабаган аткаминерлерине таянуу менен Боршайком билдирди.
Киберчабуулдан экономикалык жана соода санкцияларын иштеп чыгуу жана колдонуу менен алектенген чет элдик активдерди көзөмөлдөө жана финансылык изилдөө дирекциясынын серверлери жабыркады.
Хакерлер ошондой эле каржы министри Жанет Йеллендин кеңсесине кирүүгө аракет кылышкан. АКШ Казыналыгынын Конгресске жазган катына ылайык, кол салгандар жашыруун эмес документтерди уурдап, үчүнчү тараптын киберкоопсуздук провайдерин бузуп алышкан. Маалыматка караганда, алардын максаты АКШ санкция салууну пландап жаткан Кытай уюмдары болушу мүмкүн.
АКШнын Каржы министрлиги бул окуя боюнча азырынча комментарий бере элек. КЭРдин АКШдагы элчилигинин өкүлү Лю Пэнью айыптоолорду четке кагып, аларды «акылга сыйбас» жана «каралоо» деп атады. Анын айтымында, Кытай киберчабуулдардын ар кандай түрлөрү менен активдүү күрөшүп жатат.
