Алматы облусунда эки айдан ашык убакыттан бери изделип жаткан Айша Хамит аттуу 26 жаштагы кыздын сөөгү карга көмүлгөн баштыктан табылды. Маркумдун эжесинин айтымында, аны муунтуп өлтүрүшкөн. Бул тууралуу Tengrinews.kz басылмасы жазды.
Айша Хамит табышмактуу жагдайларда жоголгон. 26-ноябрда кыз курбусунун туулган күнүнө Алматыдагы кечеге барган. Ошол күнү кечинде ал эжесине «бир жигит ала качып кетти» деп жазган. Мындан кийин байланышка чыккан эмес.
«Акыркы билдирүүлөрдө «эже, жигит ала качып кетти» деп жазган. Анын колунда уюлдук телефон бар эле. Биз чалып жаттык. Алар улам өчүрүп коюп жатышты. Биз аны үйлөнүү үчүн ала качып кетти деп ойлогонбуз», — деди сиңдиси Асия Хамит.
Жоголгон кызды туугандары, милиция кызматкерлери жана ыктыярчылар издешкен. Кийинчерээк укук коргоочулар кылмышкердин изине түшүшкөн.
Айша казак тили жана адабияты мугалими болуп иштеген. Ошондой эле оорулуу эжесин караган. Маркумдун туугандарынын айтымында, шектүү башта Айшанын көңүлүн алууга аракет жасап жүргөн. Кийинчерээк эки миллион теңгеден ашык насыя алган. Кыз карызды кайтарууну суранганда, маселе чыккан.
«Көрсө, акыркы жолугушууда эжем акчаны кайтарып берүүнү талап кылган экен. Ата-энесине баарын айтып берерин айткан. Полицияга кайрылам деп коркуткан. Анан аны ижарага алынган батирде муунтуп өлтүргөн. Менин билишимче, ал аны кордогон», — деген Асия Хамит.
Шектүү катары Түркестан облусунун 19 жаштагы тургуну кармалды. Азыр ал убактылуу кармоочу жайда. Бирок Айшанын туугандары мындай мыкаачылык менен өлтүрүүнү бир адам жасай албайт деп эсептешет. Алар кылмышкерлер дагы болушу мүмкүн дешет.
«Шектүү күнөөсүн четке какты. Кийинчерээк өлтүргөнүн мойнуна алып, ал тургай эжемдин сөөгү салынган баштыкты көмгөн жерди көрсөттү. Ал жер казылганда, төрт адам аны араң көтөрүштү. Бул кылмышты бир нече адам жасаган деп эсептейбиз. Ошондуктан биз күнөөлүүлөрдүн баары жазаланышын талап кылабыз», — деди маркумдун агасы Табигат Алибек.
Адам өлтүрүү фактысы боюнча милицияга кылмыш иши козголду. Эгер шектүүнүн күнөөсү далилденсе, ал 15 жылга чейин эркинен ажыратылышы мүмкүн.
