Балдардын мыкаачылык менен өлтүрүлүшү Алматыны дүрбөлөңгө салды. Кылмыш 4-январда болгон. Бул үрөй учурган окуя боюнча учурда эмнелер белгилүү болгонун Tengrinews.kz жазды.
Каза болгон балдардын жакындары КТК телеканалына берген маегинде билдиргендей, балдардын бири 2-класста, экинчиси 5-класста окуйт. Каза болгондор Рафаэль менен Ринат болгону 8 жана 12 жашта болушкан.
Туугандарынын айтымында, бейшемби күнү, 4-январь күнү атасы балдарды клиникага алып барам деп үйүнөн алып кеткен. Бирок чындыгында ал балдарды ижарага алынган батирге алып кеткен. Ошол жерден мектеп окуучуларынын сөөгү табылган. Киши өлтүрүү күн сайын ижарага берилген батирде болгон. Ал шаардын борборуна жакын беш кабаттуу үйдүн төртүнчү кабатында жайгашкан. Туугандары 39 жаштагы жаран уулдарына бир нече жолу бычак сайганын айтышууда. Ал эми мурдагы жубайына кат калтырган.
Балдардын таенесинин айтымында, шектүү сыналгыны күйгүзүп, тамактандырып, дасторконго отуруп кат жазган. Андан соң балдарды бычактаган. Атасы уулдарына кылып жаткан нерсени телефонуна видеого тартып алып, эжеси менен мурдагы жубайына жөнөткөн. Ал андан кийин дароо эле өзүнө бычак менен кол салган, бирок ал аман калган. Кошуналары балдардын катуу кыйкырганын угуп, полиция чакырышкан.
Үй-бүлөдө чыр-чатактар байма-бай болуп турганын жакындары жашырышпайт. Жубайлар тогуз жыл мурун ажырашып кетишкен. Бул өч алуу экенин четке кагышкан эмес. Маалым болгондой, балдардын атасы азыр ооруканада полициянын көзөмөлүндө.
