2-июнда Астанада автобус мамыны сүзгөн. Кырсыктын кесепетинен 7 жаштагы Алуа эки бутунан ажырап калган. Кичинекей кыз буга чейин эки жолу операция болгон жана аны узак дарылануу күтүп жатат.

«Тенгри» басылмасы кыздын жакындары менен байланышып, анын абалын сурашкан.

«Эки жолу операция жасалды. 2-июнда жана 9-июнда. Гангрена болуп кетпесин деп өлгөн ткандарды алып, тери чапталды. Бутун сактап калууга менимче мүмкүн эмес болчу. Себеби, бир буту ошондо эле үзүлүп кетиптир. Экинчиси жанчылып калган. Биз аны өз көзүбүз менен көргөнбүз. Кызыбыз өтө эле өзгөрүп кетти. Мурда шайыр, жүзүнөн жылмаюу кетпеген, активдүү, чапчаң кыз болчу. Азыр түнт болуп кетти. Унчукпайт жана күлбөйт. Апасы менен да сүйлөшпөй жатат.

«Менин бутум каякта?» деген суроосу жүрөгүбүздү сууруп алгандай болуп жатат. Ал азыр түбөлүк буту жок калганын аңдабай жатат. Биз жоошкотуп, «сенде темир, жаңы бут болот» деп жатабыз. Мындай сүйлөшүү бизге кыйноодой эле болуп жатат»,— деди агасы.