Францияда нааразылык акциялары жаңы күч менен уланып, кесиптик кошуундар 1,6 миллион адам катышканын билдиришти. Бийликтин маалыматына караганда, 5-ноябрдагы акцияларга өлкө боюнча 600 миңге жакын адам чыккан. Полиция кеминде 448 адамды кармады, 53 полиция кызматкери жаракат алды.

Парижде жүрүш негизинен тынч өттү. Он миңдеген митингчилер Республика аянтына чогулуп, андан Улут аянтына чейин жүрүш жасашты. Борбор калаадагы акцияга Жан-Люк Меланшон, Марин Тонделье, Рафаэль Глюксманн жана башка белгилүү саясатчылар да катышты. Уюштуруучулардын баамында, Париждеги митингге 350 миңге чейин адам чыккан.

Эйфель мунарасы жабылып, бир катар аймактык поезддердин каттамдары токтотулду.

Жаңы акцияларды кесиптик кошуундар уюштурган. Аларга мектеп окуучуларынын жана студенттердин уюмдары, ошондой эле «сары жилеттер» кыймылы кошулган. Орто мектептердин үчтөн бирине жакыны жабылды, алардын көбүн окуучулар тосуп алышты. Мамлекеттик сектордогу кызматкерлердин 10 пайызга жакыны ишке чыкпай, иш таштоого кошулду.

Акциялардын жүрүшүндө бир катар шаарларда күч колдонулган кагылышуулар болду. Марсель, Лион, Бордо, Страсбург, Нант, По, Орлеан, Ренн жана Тулуза шаарларында окуялар катталганы кабарланды.

Жалпысынан 86 өрттөө фактысы катталган. Алардын айрымдарын радикалдык жана ультра-солчул топтор уюштурганы айтылды.

Премьер-министр Себастьен Лекорню нааразылык акциясына чыккандардын талаптарын талкуулоо үчүн 9-ноябрда конференция өткөрүлөрүн билдирди.