Германиядагы мөөнөтүнөн мурда өткөрүлгөн парламенттик шайлоонун жыйынтыгы боюнча алдын ала маалыматтарга караганда оппозициялык блок биринчи орунга чыкты.
Фридрих Мерц жетектеген Христиан-демократиялык Союздун жана Христиан-социалдык биримдиктин оппозициялык блогу Германиядагы парламенттик шайлоодо бардык 299 шайлоо округдарында добуштар эсептелгенден кийин 28,6 пайыз добуш менен биринчи орунду ээледи.
Экинчи орунда 20,8 пайыз добуш менен «Германия үчүн Альтернатива» партиясы турат. Учурдагы канцлер Олаф Шольц жетектеген Социал-демократиялык партия 16,4 пайыз менен үчүнчү орунду ээледи. «Жашылдар» партиясы 11,6 пайыз добуш алып төртүнчү орунду ээлесе, бешинчи орун 8,8 пайыз добуш алган «солчулдар» партиясына тийди.
Бундестагга эки ири партия өткөн жок. Сара Вагенкнехт союзу 4,9 пайыз, Эркин демократиялык партия 4,3 пайыз менен артта калды.
