Италиянын түштүк жээгинде Кротоне шаарынан 20 чакырым алыстыкта кеме чөгүп, 59 мигрант набыт болду. Бул тууралуу аталган өлкөнүн бийлик өкүлдөрү билдиришти.
Кырсык 25-февралда Калабриянын чыгышындагы Стеккато-ди-Кутро жээгинде болгон. Италиянын жээк күзөт кызматынын маалыматы боюнча, кайык жээкке бир нече метр алыстыкта таштарга урунуп, андагы адамдардын айрымдары өз алдынча куткарылып чыгууга үлгүргөн. Каза болгондордун арасында 12 бала бар. Баары 59 киши каза болгон. 26-февралда 81 адам куткарылып, алардын 22си ооруканага жеткирилген. Аман калгандардын айтымында, үч-төрт күн мурда Түркиянын Измиринен чыккан кемеде Ооганстан, Пакистан, Иран жана Сомалиден 140-150 киши болгон. La Repubblica гезити окуяга күбө болгондорго таянып, Калабрияда кырсыкка учураган кайыкта 250дөй адам болгонун жазды.
