«Дайыма угат, эч качан талашпайт, карыз албайт, кеңеш сурабайт же бербейт, идеалдуу тууган». Мындай пикирлер Австралиядагы бөлмө гүлдөрү жөнүндө изилдөөдө айтылат.
Австралияда окумуштуулар 18 жаштан 69 жашка чейинки 115 адамдан бөлмө гүлдөрү менен болгон мамилесин сүрөттөөнү суранышкан. Көрсө, адамдардын 14 пайызы үй гүлдөрү менен тыгыз байланышты сезишет жана аларга үй-бүлө мүчөлөрү катары мамиле кылышат. Дагы 42 пайызы өсүмдүктөргө эмоционалдык жактан байланганын моюнга алышкан. Мындай назик сезимдерди башынан өткөргөн эркектердин үлүшү аялдарга караганда кыйла төмөн. Эркектердин 12 пайызы бөлмө гүлдөрү менен мамилеси жок экенин айтышкан. Изилдөөнүн катышуучулары өсүмдүктөрдүн эмоционалдык абалына оң таасирин тийгизип, стресстин деңгээлин төмөндөтүп, үйдүн климатын жакшыртканын айтышкан.
48 жаштагы киши өсүмдүктөрүнө болгон сүйүүсүнөн улам күн сайын алар менен сүйлөшүп жүргөнүн айтып берсе, 27 жаштагы аял гүлдөрүн балдарым деп эсептейт. Үй өсүмдүктөрү боюнча изилдөөнү жетектеген илимпоз Брианна Лебуск «гүл өстүрүү көптөгөн адамдарга кам көрүүнү жана канааттанууну берет» дейт.
Багбанчылык коомунун башкы илимпозу Тияна Блануза: «Бул изилдөө адамдардын үй өсүмдүктөрү менен болгон мамилесинин ар кандай экенин көрсөттү. Гүл ээлери өсүмдүктөрдүн эстетикалык жана тынчтандыруучу ролун баалаарын билдик. Өсүмдүктөрдүн ден соолугу чың болушу ээлеринин да жыргалчылыгын камсыз кылат», — деди.
