Кабулдагы жардыруудан кеминде 90 киши каза болуп, 150 киши жаракат алды. Бул тууралуу «Известия» Ооганстандын Саламаттыкты сактоо министрлигине шилтеме берүү менен жазып чыкты. «Кабул аэропортунда жана анын жанындагы жардыруулардан каза болгондордун саны 90 кишиге жетти», — деп жазат басылма.
АКШнын Борбордук командачылыгынын башчысы, генерал Кеннет Маккензи Кабулдагы жардыруулардын артында Ислам мамлекети турганын айтты. Ал ошондой эле жардыруунун кесепетинен 12 америкалык аскер каза болуп, дагы 15и жарадар болгонун айтты.
Кечээ, 26-августта Ооганстандын борборунда болгон биринчи жарылуу аэропорттун кире беришинде, экинчиси — Барон мейманканасынын жанында болгон. Массалык маалымат каражаттары жанкечтинин биринчи жардырууга тиешеси бар экенин жазышууда. Экинчи жардыруу, Sky News телеканалынын маалыматы боюнча, миналанган машинанын жарылуусунан улам болгон. Андан кийин RT телеканалынын кабарчысы билдиргендей, Кабулда үчүнчү жардыруу да катталган. Мындан тышкары, дагы эки жаңы жардыруу болгону кабарланды. Кийинчерээк Ооганстандын баш калаасындагы жаңы бийлик жардыруу АКШнын куралдуу күчтөрү тарабынан жабдууларын жок кылуу үчүн чыгарылганын айтышты.
