Мээси өлгөн, бирок ичиндеги ымыркайы өсүшү үчүн аппаратта жаткан америкалык аял тууралуу «Орда жазды».
Маалыматка караганда, 2025-жылдын февралында сегиз жумалык кош бойлуу Адриана Смит башы катуу ооруп жатканын айтып, дарыгерлерге кайрылган. Атлантадагы Нортсайд ооруканасында алар муну кош бойлуулуктун татаал өтүп жатышы деп ойлошуп, дарылоону жазышкан. Эртеси эртең менен жолдошу анын уктап жатканда дем жетпей жатканын көргөн.
Адриана тез арада Эмори университетинин ооруканасына (ал жерде медайым болуп иштеген) жеткирилип, томографиядан өткөн. Анын мээсинде бир нече уюган кан табылган. Дарыгерлердин аракетине карабастан мээси өлгөн.
Мээнин өлүмүндө дене өз алдынча дем ала албайт, кыймылдай албайт, жүрөк аппарат жок сокпойт. Кадимки жагдайда аппарат өчүрүлүп, үй-бүлө менен коштошууга мүмкүнчүлүк берилет. Бирок Адриана кош бойлуу болчу.
Жоржияда алтынчы жумадан кийин аборт жасоого тыюу салган «Жүрөктүн согушу жөнүндө мыйзам» бар. Түйүлдүккө адам катары мамиле кылынат жана аны токтотууга катуу аныкталган шарттарда гана жол берилет.
Эмори дарыгерлери аппаратты өчүрүү түйүлдүктүн өмүрүн токтотот деп ойлоп, түйүлдүк жетилгенден кийин кесарево операциясы жасалат деген ойдо болушат. Бул кадам анын үй-бүлөсү менен макулдашылган эмес.
Адриана Смит үч айдан бери аппаратта жатат жана 2025-жылдын августунда кесарево пландалууда.
