Актауда жолдон өтүп бара жаткан адамга көп кабаттуу үйдүн терезесинен эмерек ыргытылган. Омурткасы сынган эркек киши Мангыстау облустук ооруканасына жаткырылды. Бул тууралуу Tengrinews.kz жазды.
Жабырлануучунун жакындарынын айтымында, окуя 12-январь күнү саат 13:00дө 11-кичирайондогу 41-үйдүн жанында болгон. Жашоочулар 6-кабаттагы батирден эмеректерди ыргытып, 39 жаштагы адамдын үстүнө түшкөн. Аны эс-учун жоготкон абалда Тез жардам кызматы алып кеткен.
«Эмерек ыргытылган үйдө көп балалуу үй-бүлө жашайт. Окуя болгон учурда терезеден 12-13 жаштагы өспүрүм көрүнгөн. Ата-энеси үйдө жок болчу. Күбөлөрдү издеп жатабыз», — деди жабырлануучунун бир тууган агасы Аман.
Азыр жабырлануучу ооруканада. Туугандарынын айтымында, моюн омурткалары сынган, колу-буту кыймылдабай жатат. Участкалык милицияга маалым болгондой, эмеректер 6-кабаттан ыргытылган.
