Казакстанда эки баласы жана аялы каза болгон өрттөнгөн үйдөн качып чыгууга үлгүргөн үй-бүлө башчысы аларды өлтүрүүгө шектелип кармалды. Бул тууралуу Tengrinews.kz жазды.
Басылманын маалыматына караганда, Береке кичи районундагы үйлөрдүн биринде чыккан өрттөн үй-бүлө башчысы гана аман калган. Ал терезени чагып, секирип чыккан. Анын айтымында, 20 жаштагы аялын жана кичинекей балдарын алып чыгууга аракет кылган. Бирок өрт өчүрүлгөндөн кийин алардын сөөгү табылган.
«Ошол эле күнү кылмыш иши козголуп, ал РИИБдин тергөөчүлөрүнө өткөрүп берилген. Ошол учурда өрттүн алдын ала себеби — электр зымдарынын кыска туташуусу катары катталган», — деп айтылат маалыматта.
Полиция келиндин жана балдардын өлүмү кылмыш мүнөзүндө экенин тастыктаган. Иш “өрт коопсуздугунун талаптарын бузуу” беренесинен “эки же андан ашык адамды өлтүрүү” беренесине өзгөртүлгөн. Полиция азырынча башка чоо-жайын ачыктай элек. Кылмышка шектүү катары үй-бүлө башчысы кармалып, камакка алынды.
25-сентябрда куткаруучулар жеке үйдөн чыккан өрттү өчүрүү учурунда үч адамдын — 2003-жылы туулган келиндин, 2022-жылы жана 2018-жылы туулган балдардын жансыз денесин табышкан.
