Казакстандын Талгар шаарында киши колдуу болгон өспүрүм Шерзат Болаттын иши боюнча соттук отурум уланууда. Сот отурумунда прокурор өспүрүмдүн өлүмү боюнча айыпталып жаткан тогуз адамды бир жарым жылдан 23 жылга чейин эркинен ажыратууну суранды. Бул тууралуу «Азаттыктын» казак кызматы жазды.
Маалыматка караганда, прокурор Дана Сарсенбай өспүрүмдү өлүмгө жеткирген сокку үчүн Абзал Чынасылды 23 жылга эркинен ажыратууну суранды. Чынасылга «Өзгөчө мыкаачылык менен киши өлтүрүү» беренеси коюлган.
Прокурор калган сегиз адамдын ичинен төрт адамга жети жыл, бир адамга тогуз жыл, дагы бирине 15 жыл жана жашы жете элек дагы бир шектүүнү бир жарым жылга эркинен ажыратууну өтүндү.
Мындан тышкары, мамлекеттик айыптоо жабырлануучулардын материалдык жана моралдык зыяндын ордун толтуруу боюнча талаптарын толугу менен канааттандырууну суранууда.
Казакстандын Талгар шаарында 16 жаштагы Шерзат аттуу өспүрүм бир банка сыра үчүн көз жумган. Кылмыш 4-октябрда Шерзаттын үй-бүлөсүнүн дүкөнүндө болгон. Дүкөн ээси менен сатып алуучунун ортосунда жаңжал чыккан. Ал эми Шерзат атасына болушкан. Дүкөндөн чыккан сатып алуучу өзүнүн тааныштарын маселени чечишүүгө чакырган. 2 унаа менен 13 киши келген. Алардын колдорунда тапанча, бычак болгон. Шерзат анын атасы жана агасы катуу сабалган. Өспүрүмдүн жүрөк жана көкүрөк тушуна бычак сайылган. Анын башына тапанча менен ургулашкан. Кесепетинен өспүрүм ооруканада каза болгон.
