Түндүк жана Түштүк Кореянын ортосундагы унаа жана темир жолдорунун бузулушу транспорттук байланыштардын бузулушун гана эмес, Корей жарым аралын бириктирүү идеясын четке кагууну да билдирет. Бул тууралуу Ким Чен Ын билдиргенин KCNA агенттиги жазды.
«Биздин армия Корея Республикасы бөтөн жана душман мамлекет экенин дагы бир жолу айкын түшүнүшү керек. Мындан 2 күн мурун алардын аймагына баруучу жолдорду, темир жолдорду толугу менен буздук. Бул физикалык жактан гана эмес, Сеул менен байланыштарды да үзүү дегенди билдирет», — деди ал.
15-октябрда Түндүк Кореянын аскерлери Түштүк жана Түндүк Кореяны бириктирген жолдорду жардырышкан. Маалымат каражаттарынын жазганына караганда, Түндүк Корея эки өлкөнүн аймактарын толугу менен ажырата турганын эскерткен. Пхеньян кошумчалагандай, кокустан чыр-чатактарды болтурбоо үчүн алар америкалык аскерлерге пландары тууралуу маалымат беришкен. Буга чейин Түндүк жана Түштүк Кореяны автомобиль жана темир жолдор байланыштырып турган. Мурда алар эки өлкөнүн кызматташтыгынын символу болуп келген.
