Куранды өрттөгөн ирактык Салван Момиканы Стокгольмдун чет жакасындагы Сёдертельеде түн ичинде атып кетишкен.
Swedinfo маалымдагандай, 29-январь саат 23:00дөн кийин ок атышуу болгондугу тууралуу кабардан кийин Ховшё аймагына полиция жана тез жардам кызматкерлери чакырылган. Швециянын маалымат каражаттары жазгандай, өлгөн адам Куран күйгүзгөн Салван Момика болгон.
38 жаштагы Салван Момика 2023-жылы Куранды эл алдында өрттөп, атактуу болгон. Анын иш-аракеттери ислам дүйнөсүнүн кыжырына тийген. Айрымдар аны өлүм менен коркутушкан. Аль-Куфада анын башы үчүн 2 миллион доллар сыйлык жана эки килограмм алтындан жасалган Куран китебин сунушташкан. Ал эми Багдад өкмөтү Салванды экстрадициялоону талап кылып келген.
2024-жылдын августунда ага Швецияда этникалык топко каршы чакырык жасаган деген айып тагылган. Соттун чечими бүгүн, 30-январда жарыяланышы керек болчу. Жергиликтүү басылмалардын маалыматына караганда, Салван Момиканын өлүмүнө байланыштуу беш адам камакка алынган.
