Кытай бийлиги коронавируска каршы вакциналарды 69 өлкөгө бекер жеткирип, дагы 43 өлкөгө сатат. Бул тууралуу 7-мартта Бүткүл кытайлык эл өкүлдөр жыйынынын (мыйзам чыгаруучу жогорку орган) сессиясында Мамлекеттик кеңешчи, тышкы иштер министри Ван И билдирди.
Маалыматка ылайык, Кытай өнүгүп келе жаткан өлкөлөргө эмдөөгө жардам берүүгө даяр экендигин баса белгиледи. Ошондой эле ал Кытай эл аралык аренада башка өлкөлөргө тиешелүү дары-дармектерди жеткирүүдө атаандашууга ниеттенбестигин билдирди. «Кытайлык вакцина жөнүндө сөз болуп жатабы, же ал башка өлкөлөр тарабынан иштелип чыккан дарыбы, айырмасы жок. Эң башкысы, бул продукт ишенимдүү жана коопсуз», — деп айтты Ван И. Министр коронавируска каршы вакциналар дүйнө жүзү боюнча популярдуу кенчке айланарына чын жүрөктөн үмүттөнөрүн билдирген.
Аны менен катар Кытай бийлиги коронавирус пандемиясын жеңип, акыркы жеңишке жетүү үчүн башка өлкөлөр менен активдүү өз ара аракеттенүүнү уланта берет. Кытайдын тышкы иштер министри: «Биз бардык өлкөлөр менен кызматташууга даярбыз жана адамзат коронавирустун үстүнөн акыркы жеңишке жетиши үчүн тынымсыз аракет кылабыз», — деди ал.
Ван Инин айтымында, мамлекет бул маселеге терең көңүл бурууну уланта берет жана дүйнөдө бир дагы вирус жуккан адам калмайынча, башка мамлекеттерге жардам берет. «Тилектештик — бул күч, ал эми туруктуулук биздин жеңишибизди камсыз кылат», — деп билдирген Кытайдын министри.
