30 жаштагы Сухроб мурда Тажикстандан Орусияга барып, иштеп жүргөн эмгек мигранты болгон. Ал «Озоди» радиосунун Тажик кызматынын редакциясы менен байланышып, достору таанышууну сунуштаган кызга үйлөнгөнүн, бирок нике түндө жубайынын кыздык белгиси жок болгонун айтып берген. Ал жубайынын ата-энесин сотко берип, тойго короткон акчасын кайтарып берүүнү талап кылган. Сот анын доосун четке каккан. Ал эми келиндин үй-бүлөсү кызына жалаа жабылып жатат деп айыптап, доо арыз менен кайрылышкан.
Сухроб үйлөнүү тоюна акча топтоо үчүн 3 жыл чет өлкөдө иштеп келгенин айткан. «Жердешим менен Орусияда иштеп жүргөнбүз. Бир күнү сүйлөшүп калып, жубай издеп жүргөнүмдү айттым. Ал 22 жаштагы Хосият (аты өзгөртүлдү) менен таанышып көрүүнү сунуштады. Тажикстанга келип, жолугуп, бири-бирибизди жактырып калганбыз»,- деген ал.
Сухроб менен анын колуктусунун үйлөнүү тою 2024-жылдын 20-сентябрында өткөн. Анын айтымында, ал тойго жана кыздын себине 60 миң сомони (5500 доллар) короткон. Нике түнү анын кыздык белгиси жоктугун билген. Жубайы баарын кийинчерээк түшүндүрүп берерин айткан. «Бир айдан кийин Хосият мектепте окуп жүргөндө тууганы тарабынан зордук-зомбулукка кабылганын мойнуна алды, бирок ал бул окуя тууралуу эч кимге айткан эмес», — деген күйөөсү.
Күйөөсү Хосияттан соттук-медициналык экспертизадан өтүшүн талап кылган. Хосият экспертизадан өткөн. Республикалык соттук-медициналык экспертиза борборунун корутундусунда кыздыкка качан зыян келтирилгенин аныктоо мүмкүн эмес деп жазылган. Жыйынтыгында ал өзүн алданып калдым деп эсептеп, аялынын ата-энесине телефон чалган. «Кайын атам мени угуп, кызын алып кетерин айтып, эч кимге айтпай туруумду суранды», — дейт Сухроб.
Ал кыздын ата-энесинен тойго кеткен акчаны кайтарып бериши керек экенин айтышкан. Кыздын атасы макул болуп, 50 миң сомони берерин айткан. «Мен макул болгом, бирок акчаны беришкен жок»,- деди ал. Акчасын ала албай калганда сотко кайрылган. Кыздын ата-энеси да кызга жалган жалаа жаап жатат деп моралдык чыгым төлөп бериши керек деген негизде доо арыз менен кайрылган. Журналисттерге кыз тараптан эч ким комментарий берген эмес.
Тажикстандын соту Сухробдун доосун четке каккан. Бирок Хосияттын үй-бүлөсүнүн койгон дооматтын канааттандырган. «Эми мен аларга 10 миң сомони карыз болуп калыптырмын, бул окуядан кийин апам ооруп, ооруканага жатып калды», — дейт Сухроб. Ал Хосияттын үйлөнүү тоюна чейин текшерүүдөн өтүүсүн талап кылбаганына өкүнүп жатканын айтат.
