Ливиянын башкы прокурору кечээ, 25-сентябрда Дерна шаарын суу астында калтырып, миңдеген адамдардын өмүрүн алган эки дамбанын кыйрашына шектүү катары сегиз аткаминерди камоого буйрук берди. Бул тууралуу Deutsche Welle жазды.
Прокурорлор ошондой эле Суу чарба жана дамба башкармалыгынын кызматкерлерин тергөө аяктаганга чейин камакта калтырууну буйруду. Алар шалаакылык жана кырсыкка алып келген каталар үчүн айыпталууда. Прокурорлордун айтымында, чиновниктер айыптоодон кутулуу үчүн жетиштүү далилдерди келтирген жок.
Ливиянын Дерна шаарында селден каза болгондордун саны 11,3 миң адамга жеткен. Бороон-чапкын Ливиянын жээгине Жер Ортолук деңизинен келип, ал нөшөр жаан жана күн күркүрөө менен коштолгон. Өзгөчө Дерна шаары жабыркап, анда эки дамба талкаланган. Кесепетинен бүт аймактар суу алдында калып, жергиликтүү тургундарды агым Жер Ортолук деңизге агызып кеткен. Селден каза болгондордун жансыз денеси жээкке чыккан.