Москвада көп кабаттуу бир нече үйгө учкучсуз учактар келип урунду. Маалыматка караганда, оор жаракат алгандар жок.
Бир учкучсуз учак Профсоюзная көчөсүндөгү турак үйдүн үстүңкү кабаттарына тийген. Үйдүн фасады жана айнектери талкаланган. Экинчиси Жаңы Москвадагы Атласов көчөсүндөгү 24 кабаттуу турак жайды сүзгөн. Ушул тапта жеринде атайын кызматтар иштеп жатат.
112-Telegram каналынын маалыматы боюнча, баш калаада кеминде үч үйгө учак тийген. Москванын жанындагы Одинцово жана Красногорск шаарларында бир нече учкучсуз учактар байкалып, алар борборго жакындаганда атып түшүрүлгөн.
Baza каналы ошондой эле Москва облусунда 10дон ашык учкучсуз учак атып түшүрүлгөнүн, алардын көбү Истра, Красногорск жана Одинцово райондорунда болгонун кабарлады.