Тажикстанда Москва облусундагы мектепке жасалган кол салуунун кесепетинен каза болгон 10 жаштагы Кобилджон Алиевди акыркы сапарга узатуу зыйнаты өтүп жатат.
«Азия-Плюс» басылмасынын маалыматына ылайык, акыркы сапарга узатууга Шахринав районунун көптөгөн тургундары, ошондой эле Тажикстандын башка аймактарынан келген адамдар катышып жатышат.
- 16-декабрь күнү эртең менен Москва облусунун Одинцово районундагы мектептердин биринде окуучу мектепке куралдуу кол салган. Ал имараттын ичинде жаш агызуучу газ баллонун чачып, андан соң күзөтчүнү жана төртүнчү класстын окуучусун бычак менен сайган. Каза болгон — Тажикстандын жараны, 10 жаштагы Кобилжон Алиев болгон. Киши өлтүрүү фактысы боюнча кылмыш иши козголду. Кол салган өспүрүмдүн ошол эле мектептин окуучусу экени аныкталган.
«Бүгүн саат 9:00дө полицияга мектептин окуучусу күзөтчүнү бычак менен сайып, жаш агызуучу газ баллонун чачып, андан соң он жаштагы окуучуну бычак менен жарадар кылганы тууралуу кабар түштү. Ал бала алган жаракатынан улам каза болду», — деп билдиришкен Москва облусунун полициясы.
Укук коргоо органдарынын маалыматына ылайык, кол салган ошол эле мектептин 15 жаштагы окуучусу Тимофей К. болгон. Ал кармалган. Орусиянын Тергөө комитети киши өлтүрүү жана киши өлтүрүүгө аракет кылуу беренелери боюнча кылмыш ишин козгоду.
«Сурак жүрүп жатат. Алдын ала маалыматтар боюнча, [кол салган өспүрүм] күнөөсүн мойнуна алууда», — деп журналисттерге билдиришти полициядан.
Каза болгон баланын аты Кобилжон Алиев болгон, ал Тажикстандын жараны экени белгилүү болду. Кобилжондун апасы ал окуган мектепте пол жууп иштечү. Жолдошу каза болгондон кийин ал эки баласын — Кобилжонду жана ошол эле класста окуган анын эгизин жалгыз өзү тарбиялап келген. Телеграм-каналдардын маалыматына ылайык, кол салуудан кийин Кобилжондун апасы уулдарын алып кетүү үчүн мектепке келген. Ал балдарынын бирөө өлтүрүлгөнүн билген эмес. Бул тууралуу ага ошол жерде эле айтышкан.
Кол салуу болгон күнү шектүүнүн «No Lives Matter» [Эч кимдин өмүрү маанилүү эмеc] деген жазуусу бар футболка кийип жүргөнү да айтылды. Бул интернеттеги зомбулукту жайылткан уюмдун урааны. Өспүрүм бардык аракеттерин камерага тартып турган.
Тажикстандын Тышкы иштер министрлиги 17-декабрда билдирүү жасап, Дүйшөмбү бул кол салууну улуттар аралык жек көрүүнүн негизинде жасалган кылмыш деп эсептей турганын айтып, жаранына каршы жасалган чабуулду кескин айыптады.
Орусиянын Тажикстандагы элчиси Сергей Григорьев ТИМге чакырылып, ага тез арада, объективдүү жана бейтарап иликтөө жүргүзүүнү, ошондой эле кылмышка тиешеси бар бардык адамдарды мыйзам чегинде жоопко тартууну талап кылган нота тапшырылды.
