«Бөтөн адамдар мугалимди коркутууга акысы жок» деп жазды Өзбекстандын мектепке чейинки жана мектеп билим берүү министри Хилола Умарова өзүнүн телеграм каналында. Министр мугалимдердин ар-намысын жана кадыр-баркын коргоо үчүн бардык чаралар көрүлөрүн кошумчалады.
«Педагогдун укуктары, ар-намысы, кадыр-баркы жана ишкердик бедели мамлекеттин коргоосунда турат», — деди министр «Педагогдун статусу жөнүндө» Мыйзамынын 3-беренесин эске салып.
Ал социалдык тармактарда сабак учурунда сырттан келгендер сабакка кирип, мугалимдерди кемсинтип, окуучулардын алдында кол көтөрүп, кээде зордук-зомбулук көрсөткөн учурлар улам-улам талкууланып жатканын белгиледи. Умарова мисал катары жакында Сырдарыя облусунда болгон окуяны келтирди.
«Мындай кырдаалда зарыл чаралар көрүлүп, күнөөлүүлөр жоопкерчиликке тартылат», — деди министр.
Ошондой эле ал мындай учурлар болгон учурда мугалимдерге укуктук, социалдык жана психологиялык колдоо көрсөтүлөрүн билдирди. «Биз так түшүнүшүбүз керек, сабак учурунда эч кимдин сабакка кирүүгө жана чыгууга (ата-энелер дагы), билим берүү процессине жана мугалимдердин ишине кийлигишүүгө, мугалимдерди коркутууга укугу жок. Эгерде мындай учурлар аныкталса, министрлик дароо укук коргоо органдарына кайрылат», — деди Умарова.
Министрдин билдирүүсү Сырдарыя облусундагы мектептердин биринде мугалимге кол салууга байланыштуу. Интернеттеги өзбек сигментинде 12-февралда окуу бөлмөгө кирип келген аял мугалимди сабаган видео тараган. Кол салуу фактысы боюнча административдик иш козголуп, кылмыш ишти райондук сот караган. Сотко психиатриялык экспертизанын корутундусу берилген. Ага ылайык, аял жеңил акыл-эс бузулуулары менен жабыркайт жана окуя болгон учурда өзүнүн көзөмөлдөй албай калган. Буга байланыштуу сот аны жалпы психиатриялык ооруканага дарыланууга жиберүү чечимин чыгарган.
