Бүгүн, 17-мартта Өзбекстанга Улуу Британияда катталып, Индияда өндүрүлгөн «АстраЗенека» («AstraZeneca») коронавируска каршы вакцинасы жеткирилди. Бул дары «Ковакс» программасынын алкагында Өзбекстанга акысыз берилди. Алынып келген вакцина өзбек элинин 3 пайызына жетери айтылууда.
Өзбекстандын Саламаттыкты сактоо министрлиги билдиргендей, акысыз берилген вакцина Дүйнөлүк саламаттыкты сактоо уюму тарабынан сунушталган 3 дарынын бирөөсү. Өзбекстанга жалпы 2 миллион 600 миң доза вакцина берилет. Бүгүн анын 660 миң дозасы жеткирилди. Эми дарылардын кийинки партиясы май айында келип түшөт.
Вакцина Өзбекстанда кыска убакытта текшерилет, себеби буга чейин «АстраЗенека» дарысы башка өлкөлөрдө сыналган. Өзбекстан вакцинаны 1 жумада сынап бүтөт. Алгач 16 жаштан жогору балдар эмделет. Ушул жылдын соңуна чейин «Ковакс» программасынын алкагында өзбек элинин 20 пайызы эмдөөдөн өтөрү пландалууда.
Өзбекстандын Саламаттыкты сактоо министрлиги «АстраЗенека» дарысынын зыяны жок экенин билдирди. Министрлик бул вакцина менен 14 миллион адам эмделгенин жана алардын ичинен 17 киши гана терс таасирин сезгенин белгиледи.
