Индиянын Пакистандагы аба соккуларынан каза болгондордун саны 26га жетип, дагы 46сы жаракат алды. Бул тууралуу Пакистандын куралдуу күчтөрүнүн басма сөз катчысына шилтеме берүү менен Reuters жана Bloomberg агенттиги кабарлашты.
Reuters агенттиги Индиянын полициясына таянуу менен Пакистандын соккусунан 10 адам каза болуп, 48и жаракат алганын кабарлады.
7-майга караган түнү Индия армиясы 22-апрелде Пахалгамда 26 адамдын өмүрүн алган террордук чабуулга жооп иретинде Пакистандын чек ара аймагында антитеррордук операция өткөрдү. Пакистан аба мейкиндигин 48 саатка жаап, согуштук учактарга каршы күрөш жүргүздү. Пакистандын Коргоо министрлигинин маалыматына караганда, Индиянын аскер-аба күчтөрүнүн беш учагы атып түшүрүлгөн.
