Аляскадагы Элмендорф-Ричардсон аскердик базасында Орусия менен АКШ президенттери Владимир Путин жана Дональд Трамп жолугушту. Бул тууралуу Медуза басылмасы жазды.
Бул 2019-жылдан бери алардын алгачкы жолугушуусу болуп, ошондой эле Орусиянын Украинага кол салуусу башталгандан бери Путиндин АКШ президенти менен болгон биринчи жолугушуусу болду (2021-жылдын жайында ал Жо Байден менен жолуккан). Ошондой эле бул Путиндин 2015-жылдан бери АКШга болгон алгачкы сапары болду.
Жолугушуу эки жарым сааттан ашык убакытка созулду. Башында президенттер бирге отуруп, котормочулар менен гана сүйлөшөт деп пландалган, бирок башталардын алдында формат өзгөртүлүп, сүйлөшүүлөргө Путин жана Трамп менен бирге тышкы иштер министрлери Марко Рубио жана Сергей Лавров, ошондой эле АКШ президентинин атайын өкүлү Стивен Уиткофф жана Орусия президентинин жардамчысы Юрий Ушаков катышты. Көрүнүп тургандай, олуттуу макулдашууларга жетишүү мүмкүн болгон жок. Сүйлөшүүлөрдөн кийин Путин жана Трамп маалымат каражаттарынын алдына чыгып билдирүүлөрүн окуп беришти — Орусия президенти болжол менен сегиз мүнөт сүйлөсө, АКШ президенти төрт мүнөткө жетпеген убакыт сүйлөдү.
Путин Трампка меймандостугу үчүн ыраазычылык билдирип, Украинадагы жаңжалдын «алгачкы себептерин жоюу зарылдыгын» дагы бир жолу баса белгиледи жана эгерде 2022-жылы Трамп президент болгондо, согуш чыкмак эмес деди. Ал эми Трамп болсо, «азырынча эч кандай келишим жок» экенин айтып, бирок тараптар «олуттуу жылыштарга» жетишкенин билдирди жана Путин бул согушту бүтүрүүнү каалап жатат деген ишенимин дагы бир жолу айтты. АКШ президенти Путин менен жакын арада кайрадан жолугууга үмүттөнүп жатканын билдирсе, Путин ага англисче «Next time in Moscow?» деп жооп узатты. Андан соң эки президент журналисттердин суроолоруна жооп бербей, залдан чыгып кетишти.
https://youtu.be/3KjM8_prUlw?si=_RsD2GgavDbsXaZq
