Швециянын Стокгольм шаарында «америкалык аттракциондун» вагондорунун бири рельстен чыгып кетип, бир киши каза болду. Андан тышкары тогуз адам жаракат алганын аталган өлкөнүн басылмалары жазышты.
Кырсыкта адамдар бир нече метр болгон бийиктиктен кулап, ооруканага чоңдор да, балдар да жеткирилген. Анын ичинен үчөөнүн жаракаты оор. Алдын ала маалымат боюнча, аттракциондогу механизм көзөмөлдөн чыгып, вагон бийиктикте токтоп калган учурда жүргүнчүлөр кулай баштаган. Айрымдарын түшүрүү үчүн өрт өчүрүүчүлөрдү чакырышкан.
Кырсыктан кийин парк жабылып, полиция тергөө иштерин алып барып жатат.
