Тажикстанда Турсунзаде шаарынын 40 жаштагы тургуну 15 жаштагы уулун мыкаачылык менен өлтүргөн деген шек менен кармалды. Бул тууралуу өлкөнүн Ички иштер министрлиги билдирди.
Тергөөнүн версиясы боюнча, атасы уулун май айында 800 сомони жана июль айында 600 сомони уурдаган деп шектеп, күч колдонуу менен мойнуна алдыргысы келген. Ал баласын Навобод айылындагы ээн жерге алып барып, өспүрүмдү «Тико» унаасына бутунан байлап, жүз метрдей жерге чейин сүйрөп барган. Бала алган жаракатынан улам үйүндө каза болгон.
Кылмышка шектүүгө карата Тажикстандын Кылмыш-жаза кодексинин 110-беренесинин 3-бөлүгү менен кылмыш иши козголуп, тергөө иштери уланууда.
Asia-Plus жазгандай, окуядан бир нече күн мурун айыпталуучу баласын насвай колдонгону үчүн сабап салган. Андан кийин өспүрүм атасынан 600 сомони уурдап, борбор калаадагы таежесине качып, бир нече күн дайынсыз болгон. Уулунун кайда экенин билген киши аны таап, бутунан унаага байлап, үйүн көздөй сүйрөп кеткен. Андан соң, жер төлөгө камап салган. Эртеси эртең менен баланын абалы начарлап кеткенде, атасы дарыгерди чакырып, анын каза болгонун билген.
Ал каза болгондон кийин ата-энеси кылмыштын изин жашырып, сөөктү башка аймакка алып барып көмүүгө аракет кылышкан, бирок жолдон милиция кызматкерлери тарабынан кармалган. Маркумдун апасы жана бир туугандары эмне болгонун билишкен, бирок атасы уулуна эч кимди жолоткон эмес.
