Ушул жылдын биринчи кварталында TikTok видео кызматы 13 жашка чейинки балдарга таандык болгон 7,3 миллион баракчаны өчүрдү. Бул тууралуу чет элдик басылмалар жазып чыкты.
Бул маалыматтар TikTok Коомдоштукка шайкештик жөнүндө отчетунда камтылган. Өспүрүмдөр арасында популярдуу болгон кызмат 13 жашка чейинки балдарга аккаунттарды түзүүгө мүмкүнчүлүк бербейт. Биринчи кварталда ар кандай мыйзам бузуулар үчүн 11,2 миллионго жакын баракча өчүрүлгөн. Бул видео кызматындагы бардык эсептердин 1 пайызына жетпейт. Ошондой эле ар кандай мыйзам бузуулардан улам дээрлик 62 миллион видео алып салынды. “Андан сырткары жашы көрсөтүлбөгөн баракчалар дагы өчүрүлөт. Бирок алардын баарын жок кылуу убакытты талап кылат”, — деп жазылат маалыматта.
Ушул жылдын январь айында TikTok өспүрүмдөрдү коргоого багытталган жаңы эрежелерди киргизген. Алардын бири 16 жашка чейинки балдардын баракчалары купуя болуп, тастыкталган аккаунттар гана видеолорду көрө алышып, комментарийлерди калтыра алышат.
