Дашөгүз велаятына караштуу Гороглы этрапында жеңилдетилген ун үчүн кезекке турган аял мушташып, каза болду. Окуяга байланыштуу мамлекеттик дүкөндүн сатуучусу камакка алынган.
Окуя 14-июлда болгон. Ун үчүн болгон мушташта 45 жаштагы аял дүкөндүн кире беришиндеги тепкичке башы менен кулап, ошол жерде каза болгон.
Өткөн жума күнү Гороглыда абанын күндүзгү температурасы +44 градустан жогору көтөрүлгөн. Дүкөндүн алдына 300дөй адам чогулган. Алар 3 айдан бери ундун берилишин күтүп жүрүшкөн. Сатуучу алып келген ун абдан аз экенин, баарына жетпей турганын айткан. Эл дүкөнгө чуркап келишкен. Каттоо үчүн кезек болгонуна карабай эл топтолуп, башкалардан мурда ун сатып алууга аракеттене башташкан. Натыйжада айыл тургундарынын ортосунда уруш жаралып, ал мушташка айланган.
Жыйынтыгында алты баланын энеси тамак-аш талашуунун курмандыгы болгон. Мушташ учурунда аял тепкичтен жыгылып, тепкичтин четине башы менен катуу тийген. Ал алган оор жаракатынан улам окуя болгон жерден каза болгон.
