Түштүк Кореядагы токой өрттөрүнөн 24 адам каза болуп, 26 адам жаракат алды. 23 миңден ашуун тургун үйлөрүн таштап кетүүгө аргасыз болгонун Би-Би-Си билдирди.
Кореянын президентинин милдетин аткаруучу, премьер-министр Хан Док Су өрттөрдү өлкөнүн тарыхындагы эң коркунучтуу өрт деп атады. Полициянын маалыматына караганда, каза болгондордун көбү 60-70 жаштагылар. Жаракат алган 26 адамдын 12синин абалы оор.
Кырсыкты жоюу учурунда өрт өчүрүүчү тик учак кулап, анын учкучу каза болгон. Йонхап маалымат агенттигинин маалыматына караганда, учкуч 73 жашта болгон.
Катуу жана кургак шамалдан улам келип чыккан токой өрттөрү өткөн жума күнү Түштүк Кореянын түштүк-чыгышында Сеулдан 250 чакырым алыстыкта жайгашкан Санчхон округунда башталган. Кийинчерээк өрт кошуна округдарга, анын ичинде Ыйсон, Чонсон, Ёнъян жана Ёндок, ошондой эле Андон шаарына жайылган.
