Бүгүн, 5-февралда Жогорку Кеңештин жыйынында депутат Жанар Акаев «Кыргызстандагы ички чарбалык маселеге Орус өкмөт башчысынын реакциясы копол болуп калды» деди.
Акаев Михаил Мишустиндин дооматы “Яндекс.Такси” ишканасына байланыштуу болушу мүмкүн экенин кошумчалады.
“Яндекс.Такси” компаниясынын менеджерлери орус өкмөтүнө бурмаланган, туура эмес маалыматтарды берип койгон болушу мүмкүн. Биринчиден, Кыргызстанда бизнес ак, кара, жашыл, кызыл деп бөлүнбөйт. Түркиядан, Орусиядан, Кытайдан же Япониядан келеби, бардыгына бирдей мамиле болот. Мурдагыдай криминал жок. Салык мыйзамдарына баш ийип, иштей бер деген тартип орногон. “Яндекс.Такси” боюнча бир нече депутат маселе көтөрдү. Ишкана бааны жасалма көтөргөнү аныкталган. Айдоочулардан дээрлик 21% чейин комиссия алып жатты. Экинчиден, салыкты жашырган. Аны УКМК, Салык кызматы аныктады. “Яндекс.Такси” дээрлик 100 миллион сомдон ашык акчаны бюджетке төктү. Менин маалыматым боюнча булар дагы 5 миллион доллар төлөшү керек эле. Ушундан качып чагымчылдык кылышты”, – деди ал.
Михаил Мишустин Кыргызстандын Министрлер кабинетинин төрагасы Адылбек Касымалиев менен 31-январда Алматыда жолукканда Кыргызстандын мамлекеттик органдары орусиялык компанияларга “кысымын жана негизсиз дооматтарын” токтотушу керектигин талап кылган.
3-февралда Мамлекеттик салык кызматынын төрагасы Алмамбет Шыкмаматов Михаил Мишустиндин орусиялык ишкерлерге кысым көрсөтүлүп жатканы тууралуу дооматына жооп берген. Ал коюлган дооматтарды четке кагып “Михаил Мишустин чарбалык маселеге саясий боёк берип жибергенин” билдирген.
