Бүгүн, 21-февралда «Ынтымак-Ордодо» президенттик администрациянын коллегиясы өтүүдө. Министрлер кабинетинин башчысы Адылбек Касымалиев мамлекеттик бийлик органдарынын ишине баа берилерин билдирди.
Коллегияда президенттин жана Министрлер кабинетинин чечимдерин аткарууну контролдоо башкармалыгынын башчысы Азамат Осмонов билим берүү министри Догдуркүл Кендирбаеванын ишмердүүлүгү боюнча буларды айтты: «Билим берүү министри 2024-жылдын 10 эл аралык иш сапар жасаган. Алардын жалпы узактыгы 32 иш күндү түзгөн. Кээ бир иш сапарлардын узактыгы жана мүнөзү рационалдуу эмес. Мисалы, Австрияга болгон 8 күндүк иш сапар өтө эле узак. Мындан сырткары 2024-жылдын 18-24-майында 6 күндүк Улуу Британияга иш сапарга барган. Ал жерде сапар 400 миң доллар өлчөмүндөгү каражатты окуу китептерине тартуу жана министрликке кошумча каржылоо маселелерине багыт алган, бирок иш сапар боюнча отчет анализденип белгиленген максаттар ишке ашпагандыгы анык болду».
Мындан сырткары президенттин жана Министрлер кабинетинин чечимдерин аткарууну контролдоо башкармалыгынын башчысы билим берүү тармагын санариптештирүү жана кыргыз-кытай университетин түзүү боюнча конкреттүү жыйынтыктар жок экендигин белгиледи. “Болочок үчүн билим берүү” долбооруна 200 миллион доллар тартуу маселеси дагы эле талкуу стадиясында турат», — деди Азамат Осмонов.
Жыйындын күн тартибине 4 маселе киргизилген. Атап айтканда, президенттин жана Министрлер кабинетинин чечимдеринин аткарылышын мониторингдөө жана талдоо, чет өлкөлүк жумушчу визиттердин натыйжалуулугу жана мамлекеттик органдардын ишин пландаштыруу; Билим берүү чөйрөсүндөгү актуалдуу маселелер; президентин облустардагы ыйгарым укуктуу өкүлдөрүнүн, райондук мамлекеттик администрациялардын башчыларынын (акимдердин), шаарлардын мэрлеринин 2024-жылдагы иштеринин жыйынтыктары, мамлекеттик органдарга жана жергиликтүү өз алдынча башкаруу органдарына бөлүнгөн бюджеттик каражаттарды өздөштүрүү маселелери.
Министрлер кабинетинин төрагасы Адылбек Касымалиев белгилегендей, буга чейин бардык мамлекеттик органдарда жана аймактарда коллегиялар өткөрүлүп, өткөн жылдын жыйынтыгы чыгарылган.
This is a modal window.
