«Шамбала», «Чек Арада», «Таң алдында» сериалы, «Көк бөрү», «Кыялкечтер», «Жалбыз» тасмаларында тартылган актёр Кубандык Камалов 2005-жылдан бери жашап келген үйүнөн ажырап калды. Бул тууралуу СЕРЕП МЕДИА маалымат агенттигине өзү билдирген.
Анын айтымында, 7-мартта аны 2 баласы жана ата-энесин соттун чечими менен деп көчөгө чыгарып салышкан. «Өз үйүбүзгө өзүбүз кире албай калдык. 2 балам, ата-энем менен азыр кошуналар тигип берген боз үйдө жашоого аргасыз болуп жатам», — деген ал.
Жогорку Соттон эмне үчүн бир үй-бүлөнүн мажбурлап чыгарылганын айтышты.
«7-мартта Бишкек шаарынын Октябрь райондук Сот аткаруучулар кызмат бөлүмүнүн сот аткаруучулары тарабынан соттун үйдөн чыгаруу жөнүндө чечими мажбурлап аткарылды. Ал учурга карата карызкордон Сот аткаруучулар кызматынын бөлүмүнө Жогорку Сотко кассациялык даттануу берилгендигине байланыштуу аткаруу өндүрүшүн токтотуу жөнүндө арыз, ошондой эле кассациялык даттанууну кароо жөнүндө өндүрүшкө кабыл алынгандыгы жөнүндө соттун аныктамасы келип түшкөн эмес. Башкача айтканда, карызкорлор соттун чечимине даттангандыгы жөнүндө арыз менен кайрылышы керек болчу жана өзүнүн арызы кассациялык даттанууну кароо үчүн кабыл алуу жөнүндө соттун аныктамасын тиркеши керек болчу.
Карызкорлор Д.Г.Т., Д.Ч., Ч.к.Н., К.К., Ч.к.Г., Ч.к.Н. Бишкек шаарынын Октябрь районунда жайгашкан үйдөн чыгаруу жөнүндө аткаруу барагы 2020-жылдын 28-сентябрында Бишкек шаарынын Октябрь райондук Сот аткаруучулар кызмат бөлүмүнө Октябрь райондук сотунан келип түшкөн. 2020-жылдын 29-сентябрында жогоруда аталган карызкорлорго аткаруу барагын ыктыярдуу аткаруу жөнүндө сунуш почта аркылуу жөнөтүлгөн. Бирок берилген 10 күндүк мөөнөттүн ичинде карызкорлор сунуштун талаптарын аткарган эмес. 2020-жылдын 28-сентябрында 30 күн алдын ала карызкорлорго Октябрь РИИБге, ӨКМге, Тез жардам кызматына үйдөн чыгаруу жөнүндө билдирмени 2020-жылдын 28-октябрына белгиленгендиги боюнча билдирилген. Карызкорлор сот аткаруучунун сунушуна жана билдирмесине макул болбостон, сот аткаруучунун кыймыл-аракетине даттануу менен сотко кайрылышкан. Бишкек шаарынын Октябрь райондук соту карызкорлордун арызын канааттандыруусуз калтырган. Тараптар Бишкек шаарынын Октябрь райондук сотунун аныктамасына макул болбой, Бишкек шаардык сотуна кайрылышкан. Бишкек шаардык соту 2021-жылдын 9-мартында аткаруу өндүрүшүн токтоткон. 2022-жылдын 13-апрелинде өндүрүп алуучунун ишенимдүү өкүлүнөн аткаруу өндүрүшүн жандандыруу тууралуу арыз келип түшкөн. Анткени 2022-жылдын 8-февралындагы аныктамасына ылайык сунуш жана билдирме канааттандыруусуз калтырылган. 2022-жылдын 18-апрелинде 30 күн алдын ала карызкорлорго, Октябрь РИИБге, ӨКМге, Тез жардам кызматына үйдөн чыгаруу жөнүндө билдирмени 2022-жылдын 13-майында саат 10:00гө белгиленгендиги билдирилген. 2022-жылдын 13-майынан баштап тараптар толугу менен камсыз болбой, тактап айтканда, өндүрүп алуучу, анын ишенимдүү өкүлү тиешелүү органдардын кызматкерлери белгисиз себептер менен келбегендигине байланыштуу аткаруу өндүрүшү бир нече ирет жылдырылган. Карызкорлордун арызынын негизинде бир нече ирет токтотулуп, аткаруу өндүрүшү кайра жаңыланып келген.
2023-жылдын 1-мартында аткаруу өндүрүшүн камсыз кылууда тараптар жана аткаруу өндүрүшүн камсыз кылууга көмөктөшүүчү органдар толугу менен катышкан. Бирок алар эшик ачуучу адиске карышылык көрсөтүп, жыйынтыгында эшикти ачууга мүмкүнчүлүк болгон эмес. Ошондуктан, акт түзүлүп аткаруу өндүрүшү 2023-жылдын 7-мартына саат 10:00гө жылдырылган. 7-мартта соттун чечимин аткаруу процессине тараптар жана аткаруу өндүрүшүн камсыз кылууга көмөктөшүүчү органдар толугу менен катышкан. Ошондой эле, карызкор Ч.Д., анын уулу К.К. каршылык көрсөтүшүп, алар менен бирге кошуналары, уулунун достору тарабынан аткаруу өңдүрүшүнүн камсыз кылуучуларга ар кандай коркутуулар болгон, бензин чачып, таш, балтаны колдонуу менен кол салуулар болуп, бир топ каршылык көрсөтүлгөн. Адамдын өмүрү баарынан кымбат тургандыгына байланыштуу үйгө киргенге мүмкүнчүлүк болбой, карызкорлорду тынчтандырууну гана көздөшкөн. Эшик ачуучу адис эшикти ачып жатканында карызкор Ч.Д. тарабынан адистин башына 2 жолу таш менен уруп жыйынтыгында адис жараат алган. Каршылык көрсөтүлгөндүгүнө байланыштуу сот аткаруучу тарабынан акт түзүлүп, жабырлануучу милицияга арыз жазган. Карызкор Ч.Д.ду кызматкерлер кармап милицияга алып кетишкен. Карызкордун уулу К.К. жана анын аялы каршылык көрсөтүшүп, жыйынтыгында алар түшүндүрүү жолу менен үйүнөн чыгарылган. Үйдөгү бардык буюмдарына тизме түзүлүп, карызкорлор аталган буюмдарын кошуналарыныкына алып чыгып кетишкен. Ошондой эле, карызкорлордун керектелүүчү буюмдары жана каражаттары өткөрүлүп берилген. Соңунда өндүрүп алуучуга бошотулган үй өткөрүп берилип, кулпулары жаңысына алмаштырылды», — деп айтылат маалыматта.
Журналисттер текстте коп каталар бар,ондоп койгула