8-февралда президент Садыр Жапаров «Ош базарын» кыдырган. Президенттик аппарат маалымат таратып, мамлекет башчысынын ишкерлер менен көзмө-көз сүйлөшүп, контролдук-кассалык машина системасын ишке ашыруунун жүрүшүн талкуулаганын жана түшүндүрүү иштерин жүргүзгөнүн билдиришкен.
Базарга баргандар жана сатуучулар мүмкүнчүлүктөн пайдаланып, Садыр Жапаровго жеке мүнөздөгү суроолорун да беришкен. Ал арада SUPERTV’нын каарманы президентке арманын айткан. Ал ооруп жаткан келининин операциясына жардам берүүнү суранган.
Бүгүн, 15-февралда президенттин апага 10 миң доллар бергени маалым болду. «Операциянын баасы 35 миң доллар болчу. Бизде 10 миң доллар бар эле. SUPERTV’га чыккандан кийин 3 миң 600 доллар чогулган. Кечээ президенттин атынан 10 миң доллар беришти. Акчаны анын жардамчысы тапшырды. Дагы 10 миң доллардай жетпей жатат», — деди апанын кызы.
Мындан дээрлик 1,5 ай мурда SUPERTV’нын Youtube каналына жубайлар — Руслан Мамбетов жана Залина Тыныскан кызы сүйлөй да, уга да албарын билдириштип, жардам сурап кайрылышкан эле. 4 баланы тарбиялап келе жаткан жубайлар бири-бири менен кол жаңсап сүйлөшөт. Тилекке каршы, балдардын апасы боор циррозуна чалдыгып, учурда элдин жардамына муктаж болуп турат.
