SUPERTV коомдогу көйгөйлөрдү чагылдырып, аянычтуу тагдыр ээлеринин, чындык издеп чыркыраган замандаштарыбыздын үнүн угуп келет. 2021-жылы да бул тармакта бир катар видеолорду тарттык. Биз баянын угуп, видеону коомчулукка жарыялаган соң каармандардын бир тобунун маселеси оң тарапка чечилип, дагы бир тобунун жашоосу жакшы жакка өзгөрдү. Бул ирет биз 2021-жылга саресеп салабыз.
Өтүп бара жаткан жылдын июнь айында Назгүл Ахматова аттуу келин SUPERTV’га кайрылып, элден жардам сураган эле. «Күйөөм мени «чаарала» деп кемсинтет» деген аталыштагы видео жарык көргөн соң, көрүүчүлөр арасында келинге жардам бергендер четтен чыгып, анын айрым маселелери чечилген. Кийин Ахматова эгиз кыздарын жарыкка алып келгенде да, жаңылап видео тартканбыз. Биз Назгүл Ахматова менен ушул кунгө чейин байланышып, кабар алышып турабыз. Ал учурда Кара-Балта шаарында кайрымдуу адамдар тарабынан убактылуу жашоо үчүн берилген үйдө балдары менен жашап жатканын айтты.
2021-жылдын апрель айында Баткенде кыргыз-тажик чек арасына байланышкан кагылышуудан кийин чек арага жакын жайгашкан Көк-Таш айылынын 12 жаштагы тургуну Адилдин президентке кайрылуусун тартып чыгарган элек. Бала атасы да чек аранын айынан Орусияда убактылуу кармоочу жайда отурганын, чек арага жакын жашоонун кандай кооптуу экенин айткан. Видео SUPERTV’да жарыяланган соң президент Садыр Жапаров Адил Абдурахимов менен жолугуп, атасына байланышкан маселени чечип берүүнү убада кылып, белек тапшырган. Ал эми учурда Адил Токмок шаарындагы лицейлердин биринде билим алып жаткан кези.
Дал ошол апрель окуяларында бейкүнөө 36 адамдын өмүрү кыйылып, алардын арасында Лейлектин 12 жашар тургуну Мадина Рахматжанова да бар эмес беле. Он гүлүнүн бири ачыла элек Мадинанын жанын тажиктер тараптан жааган миномёттун огу алып кете берген. Эң өкүнүчтүүсү – ал апасынын көз алдында каза тапты. Биз ооруканада жаткан Мадинанын апасынан кабар алып, видео тартып келгенбиз. Бүгүнкү күнү үй-бүлө Баткенде мамлекет тарабынан берилген үйдө жашап жатканын жана жетиштүү жардам көрсөтүлгөнүн бизге Нарбүү Хамдамованын сиңдиси айтып берди.
“Тагдыр” көрсөтүүсүнүн алкагында биз ракка кабылган 4 жаштагы Шабдан аттуу бала тууралуу видео тартканбыз. Анын оорусуна дабаа издеген ата-энеси чоң суммадагы акча керектигин айтып, биздин редакцияга кайрылган. Кечээ жакында биз каарманыбыздын ата-энесине байланышып, кубанычтуу кабар уктук. Алар учурда Шабдандын абалы жакшы жана Индия мамлекетинде дарыланууда жүргөнүн айтышты.
2021-жылдын январь айында биз «Жыландар менен аралашып жашайбыз» деген үй-бүлөнүн баянын чагылдырганбыз. Анда Ибраимовдордун үй-бүлөсү Кара-Балта шаарындагы көрүстөндөрдүн биринин жанында жыландын уюгуна катар жашап келишкенин айтып беришкен. Бул видеону 600 миңге чукул көрүүчү көрүп, жардамга кол сунгандар болду. Арадан 5 ай өткөндөн кийин кайрымдуу адамдардын көмөгү менен аталган үй-бүлө жаңы үйгө көчүп барышкан. Азыркы тапта 8 балалуу Ибраимов жаңы үйүндө жашап жаткан учуру.
Эсиңиздерде болсо, биз Ош шаарынын четинде 5 баласын жалгыз баккан Сүйүн Кудайбердиев аттуу адамдын тагдырын көрсөткөнбүз. Ал бизге берген маегинде “аялым үйүң жок болсо сени менен жашабайм, балдарды өзүң багып ал деп кетип калды” деген эле. 5 баласын жалгыз баккан каармандын баяны биздин каналда көргөндөн кийин Кудайбердиевге көптөгөн кайрымдуу инсандар жардам көрсөткөн. Биз каарманыбыз менен байланышып бүгүнкү күндөгү абалын сурап, мындай жооп алдык. «Силер тартып кеткенден кийин кайрымдуу адамдар балдарды жуунтуп-тарантып кетишти. Анын эртеси эле келип, колума 65 миң сом тапшырып кетишти. Азыркы учурда 4 балам балдар үйүндө, бирөө наристелер үйүндө жашап жатышат» дейт.
2021-жылдын 7-апрель күнү Бишкектеги «Өчпөс отту» өчүрүүгө аракет кылган блогердин видеосу социалдык тармактарга тарап, коомчулуктун кызуу талкуусуна түшкөн. Бул жоруктун авторун милиция кызматкерлери 1 сааттын ичинде кармап, эскертүү беришкени эсиңизде болсо керек. Биз дал ошол блогер Аргенден окуянын чоо-жайын билип маек курганбыз. Бул окуя кандай жыйынтыкталганын билүү үчүн Аргендин апасына кайрылганыбызда ал “Соттун бул боюнча чечими арадан жарым жыл өткөн соң 26-октябрда белгилүү болду, бул иш боюнча сот ага карата 30 миң сом айып төлөө жана 30 сааттык коомдук жумушка тартуу чечимин чыгарды, биз айып пулду төлөдүк” деди.
Мындан бир канча ай мурда SUPERTV’га “Өгөй атам зордуктап, төрөдүм. Азыр ал менин күйөөм” деген аталыштагы видео жарык көргөн. Видео чыккандан кийин каарманыбызга түрдүү жардам көрсөтүлүп, убактылуу жашоочу жай да табылган. Биз бул убакыт аралыгында каарманыбыз Гүлнур Тарас кызынан кабар алып турдук. Кийинчерээк биз көпчүлүктүн суранычы менен анын жашоосу кандай өзгөргөнү тууралуу да видео тарттык. Ал эми бүгүн Гүлнур Тарас кызы кайда жана эмне менен алектенип жатканына кызыгып, байланышсак, мындай деди: «SUPERTV’га видео чыккандан кийин документке байланыштуу бир топ маселелерим чечилди. Андан кийин 2 балам менен Казакстанга атамдын жанына келдим. Келерим менен автобуста кондуктор болуп иштеп алдым. Азыр Кудайга шүгүр, күнүнө 6000 теңге таап, айына 25 миң теңге төлөй турган батирге кирип алдым. Баарына рахмат».
Ушул жылдын сентябрь айында Гүлзат Үсөн кызы аттуу келиндин баласына байланышкан таржымалын чагылдырган элек. Анда ал жокчулуктун айынан баласын колуна көтөрүп кайыр сурап жүрүп, уулун социалдык кызматкерлерге алдырып алганын айткан. Видео жарык көргөндөн 20 күн өтүп-өтпөй, эне-бала табышты. Уулун колуна кармап маңдайы жарыла кубанган эне биздин телеканалга ыраазычылыгын билдирди.
Биздин дагы бир каарманыбыз омуртка оорусуна кабылган кичинекей Элхан Кубатбеков эсиңизде болсо керек? Ал апасы экөө бизге маек берип, элдин жардамына муктаж экенин айтышкан. Биз Элхандын азыркы абалын сурап байланыштык. «Биз Индия мамлекетине, андан кийин Түркияга барып келдик. Элхандын аралыгы айдан бөлүнүп, төрт жолу операция жасалат экен. Ошентип, 14 жашка чейин операция жасатып турат. Элханды элге аралашысын деп, мектепке бердик. Акыбалы азыр деле оор. Бизге жардам кылып кол сунган элге терең ыраазычылыгыбызды билдиребиз» дейт каарманыбыздын апасы Айзат Бекиева.
Элхан да өз кезегинде мындай кайрылуу жасады: «Ата-энелер, чоң апа, чоң аталар, сиздерге жардамыңыздар үчүн чоң рахмат. Жакында Түркияга дарыланганы кеткени жатабыз. Ар бириңиздерге Жараткан ыраазы болсун«.
Жогоруда биз 2021-жылы SUPERTV‘га тартылган каармандарынын айрымдары тууралуу гана айттык. Биз мындан ары да ушул агым менен күжүрмөн эмгек кылып, маалыматтык колдоо көрсөтүүнү уланта беребиз. 2022-жыл жакшы жаңылыктарга бай болсун! Жаңы жылыңыздар менен!
