Бишкек шаарындагы Ауэзов көчөсүндө шаар мэри Айбек Жунушалиевдин катышуусунда жашыл көчөттөрдү отургузуу иш-чарасы өттү. Мэр чынар дарагынын көчөттөрүн отургузуп, жаш көчөттөрдү сугаруу жана кам көрүү ишин өзгөчө көзөмөлгө алуу зарылдыгын белгиледи.
«Жашыл көчөттөргө сапаттуу кам көрүү болгондо гана биздин аракеттерибиз натыйжалуу болот», — деди ал. Жалпысынан жазгы өнөктүк башталгандан бери Бишкекте 6 миңге жакын жаңы дарак жана бадал отургузулду.
Учурда «Бишкек жашыл курулуш» муниципалдык ишканасынын питомнигинде 93 миң көчөт бар. Алардын ичинен 20 миң көчөт шаар аймагына отургузулат, калганы питомникте өстүрүлөт.
2025-жылы отургузулган көчөттөрдүн 86 пайызы жакшы өсүп кеткен. Быйыл шаар мэриясы борборду жашылдандыруу иштерин күчөтүп, тургундарды жана уюмдарды айлана-чөйрөнү көрктөндүрүү жана жашыл аймактарга кам көрүүгө активдүү катышууга чакырат.
