Кыргыз-өзбек мамлекеттик чек арасынын бузулгандыгы тууралуу маалымат чындыкка дал келбейт. Бул тууралуу бүгүн, 15-мартта УКМКнын Чек ара кызматынан билдиришти.
12-март күнү Баткен районунун Сай айылынын Жалпак-Таш участкасында жергиликтүү тургун Өзбекстандын чек арачылары курал менен Кыргыз Республикасынын аймагына өтүп кеткени тууралуу видео жарыялаган. Мамлекеттик чек арадагы чыр-чатактын алдын алуу максатында Кыргыз Республикасынын Айдаркен багыты боюнча чек ара өкүлдөрү Өзбекстан Республикасынын Сох багытындагы чек ара өкүлдөрү менен жолугушуу өткөрүшкөн.
«Чек ара кызматы жолугушуунун жыйынтыгында өзбекстандык аскер кызматкерлери мамлекеттик чек араны бузбаганы, бирок окуя болгон жерди текшерүү үчүн чек ара сызыгына жакын Өзбекстандын аймагында жүргөндүгү аныкталганын белгилейт. Тараптардын чек ара өкүлдөрү эки республиканын чек ара аймактарынын калкы арасында түшүнбөстүктөрдү болтурбоо үчүн мындан ары тараптардын аскер кызматкерлеринин бардык аракеттерин координациялап, тиешелүү органдарга алдын ала маалымат берүү боюнча макулдашууга келишти. Жергиликтүү бийлик өкүлдөрүнүн катышуусунда тараптардын кадастр кызматтарынын жетекчилеринин деңгээлинде дагы бир жолугушуу өткөрүү чечими кабыл алынды. Мындан тышкары, калк арасында түшүндүрүү иштерин күчөтүү чечими кабыл алынды. Кырдаал видеону жарыялаган Баткен районунун Сай айылынын тургунуна түшүндүрүлгөн», — деп айтылат маалыматта.
