Кыргызстандык Анара Мурзакулова Орусиянын «Пятница» каналындагы «Кондитер» шоу берүүсүнүн 5-сезонунун жеңүүчүсү аталып, 1 миллион рублга ээ болду. Ал СЕРЕП МЕДИА маалымат агенттигине маек берип, долбоордогу кыйынчылыктары, жакындарынын колдоосу, миллионер болуу сезимдерин бөлүштү.
Өзү жөнүндө…
— Мен 33 жаштамын. Ош облусуна караштуу Ноокат районунун Кулатов айылынан болом. Орусияга 2006-жылы келгем. Ошол жылдан бери Кыргызстанга келип-кетип жүрөм. Эсептеп көрсөм, 16 жылдын жүзү болуптур. Мен да катардагы жаштардай эле 11-классты бүтүп, жогорку окуу жайга тапшырайын дегем, бирок мен окууну бүткөн жылдары ата-энем кыйналып турганын көрүп, андан көрө жардам берейин деп Орусияга келе бергем.
6-класста башталган кызыгуу…
— Кондитердик жаатта жүргөнүмө 15 жыл болуптур. Бирок 6-7-классымдан тарта эле бышырууга кызыгып, үйдөн булочкаларды жасайт элем. Эми минтип өз алдымча иштеп жүргөнүмө 5 жыл болуп кетиптир. Ага чейин тажрыйба топтоп, чоң-чоң фабрикаларда иштеп жүрдүм.
Долбоордон түшкөн сунуш…
— Кондитер Ренат Агзамовдун «Агзамов» деген логотиби бар. Ошол логотипти издеп жүрүп эле сайттан таап алдым. Анан ушундай шоу, долбоор бар экенин уктум. «Пятница» телеканалынын сайтын карап чыктым. Анан билдирүү таштадымбы же жокпу билбейм, таппай калдым. Кийин мени өздөрү Инстаграмдан таап, сүрөтүмдү алып, «5-юбилейлик сезон болуп жатат, ошого биз ар кайсы улуттун өкүлдөрүн алабыз, торттордо улуттук начинка болсун, катышып бериңиз» деп жазышыптыр. Сүйүнгөнүмдөн баарына жарыя кылдым. Жакындарымдын «сен мыкты жасайсың, барып көр» деген сөздөрүнөн улам катыштым.
3 ай талыкпаган эмгек…
— Шоу көп эмгекти талап кылды. 3 айдай даярдандым. Күндө торттордун декорлорун жасайм. Ар кандай нерселерди ойлоном. Эки кызымды отургузуп алып, долбоорго тартылганда айта турчу сөздөрүмдү айтам. Кыздарым жанымда сөздөрүмдү угуп, 3-4 ай отурган соң тажаганын айтышты. Жолдошум экөөбүз бир видеону 2 саат тартчубуз. Ошентип 3 ай өтүп кетти.
Миллион рубль эмес, миллиондук кадыр…
— Миллион акчам бар деп көкөлөп, мактанып айта албайсың. Бардыгында эле ушундай болсо керек. Мен миллионер деген сөздү акча каражат катары эмес, менин кондитердик жаатта миллионер экенимди баамдадым. Ушунча кыргызстандыктар колдоп, кубаттап, жакшы сөздөрүн айткандан кийин финансылык эмес, моралдык жактан миллионер болгонума кубандым.
Шоу берүүдөн кийин ачылган каалгалар…
— Шоу берүүдөн кийин көптөгөн сунуштар түштү. Бишкектен, Кореядан, АКШдан инвестор болобуз дегендер болду. Колдогондор өтө эле көп. Жеке ишкерлер да жазып калышат. Москвада деле колдойбуз дегендер бар. Кондитер фабрикасын ачалы деген эже-сиңдилер бар. Мен буга абдан кубанычтамын.
Торт жасоодогу кемчиликтеримди угууну каалагам…
— Мен долбоорго жеңиш үчүн эмес, торт жасоодогу кемчиликтеримди угуу үчүн баргам. Байгеге 1 миллион рубль коюлганын кийин уктум. Финал экен дедим, мынчалык болуп кетем деп ойлогон эмесмин. Анын үстүнө Кыргызстан ушунчалык колдойт деп да ойлобогом.
Сандыкта катылган миллион…
— Миллионду корото элекмин. Сандыкта турат (күлүп).
Жакындардын колдоосу…
— Жолдошум мени колдойт. Башында жолдошум торт жечү эмес, мен жасай баштаганы жеп баштады. Жолдошума да кыйын болду. Сынак учурунда жолдошума мурда жок мүнөздү көрсөтүп койдум (күлүп). Эң негизгиси ошого чыдады. Финалга чыкканымды сүйүнчүлөйүн десем, ошол медианын алдында күтүп турган экен. «Акылдуум» деп койду. Анан кайненеме чалдык. Ыраазычылык айттым. Ыйлады. Мен үчүн баары кубанды. Ал эми мага эң кыйыны суперфинал болду. Мурда катышып көрбөсөм, атаандаштар да күчтүү болду.
Мээрим менен берилип жасалган торттор…
— Менин тортторумдун даамдуу чыгышынын сырын деле билбейт экенмин. Эң негизгиси тортторумду берилүү, анан мээрим менен жасайм. Болбосо, Орусияда тортторго кошулуучу нерселерди баарыбыз эле бир жерден алабыз да.