Бүгүн, 21-декабрда Нарын шаарынын тургуну, Улуу Ата Мекендик согуштун ардагери Тукеш Токтомушев 101 жашында дүйнөдөн кайтты. Бул тууралуу президенттин Нарын облусундагы өкүлчүлүгүнөн маалымдашты.
Тукеш Токтомушев 1923-жылы Тянь-Шань районунун Калинин колхозундагы Ворошилов айылында жарык дүйнөгө келген. 17 жаш курагында (8-классты окуп жаткан кезинде) 1942-жылдын апрель-май айларында Улуу Ата мекендик согушка чакырылган. 1943-жылы согуш талаасында денесинен жаракат алып, 1944-жылы кайра чакыртылып, Ыраакы Чыгыш фронтунда кызмат өтөгөн. 1945-жылдын февраль айында ден-соолугуна байланыштуу аскердик кызматтан чакыртылып, өзү туулуп өскөн айылына келип, оорукта кызмат өтөй баштаган.
Байбичеси экөө үй-бүлөдө 6 уул, 2 кызга, небере-чөбөрөлөрүнө, кыбыраларына татыктуу билим-тарбия берип, эрезеге жеткиришкен.