№1 Бириккен үй-бүлөлүк медицина борборунун кызматкерлери Саламаттыкты сактоо министрлигинин имаратынын жанына митингге чыгышты. Алар жетекчинин кызматтан алынышына нааразы болушууда.
Буга чейин Саламаттыкты сактоо министри Алымкадыр Бейшеналиев №2 Үй-бүлөлүк медицина борборундагы муздаткыч иштебей калгандыктан, миңге жакын доза вакцина жарактан чыкканына байланыштуу аталган борбордун жетекчиси жана №1 Бириккен үй-бүлөлүк медицина борборунун жетекчиси кызматтан алынганын маалымдаган эле.
Митингге чыккандардын айтымында, жетекчи кечээ, 21-май күнү кечинде кызматтан алынган. «Аны кызматтан кетирбеш керек эле. Биздин борборду көтөргөн, келечектүү жаш директор болчу. Нурлан Галбаев бир катар лабораториялардын ачылышына салым кошту, имараттарда оңдоо иштерин жүргүздү», — дешти алар.
Чогулгандардын алдына министрликтин өкүлү чыкты.
«Эмне үчүн аны алып салышты?» — деп сурашты чогулгандар.
«Билесиңер», — деп жооп берди ал.
«Экинчи клиниканын күнөөсү үчүн алып салдыңар», — деп чогулгандар ачууланып жатышты.
Министрликтин өкүлү аларды Саламаттыкты сактоо министрлигинин залына чакырды. Бирок дарыгерлер баш тартышты. Митингдин катышуучулары министрдин чыгуусун талап кылышты.
«Силер иштеген адамды алып салдыңар», — дешти митингчилер.
«Эгер ал иштегенде, мындай болмок эмес», — деп жооп берди Саламаттыкты сактоо министрлигинин өкүлү.
