Эл өкүлдөрү Төрөбай Зулпукаровдун баш коргоо чарасын үй камагына алмаштырууну шаардык соттон суранышып, кепилдик беришти. Жогорку Кеңештин депутаттары депутат Төрөбай Зулпукаровдун камакка алынышына кабатырлыгын билдиришүүдө.
Мыктыбек Абдылдаев, Бакыт Төрөбаев, Канат Исаев, Рыскелди Момбеков, Жылдыз Мусабекова, Улан Примов, Шайлообек Атазов, Каныбек Иманалиев баштаган депутаттардын басымдуу бөлүгү Жогорку Кеңештин депутаты, экс-вице-спикер Төрөбай Зулпукаровду камакка алуу мыйзамсыз экенин белгилешти.
Парламентарийлер укук коргоо жана сот органдарынан ишти ачык, калыс жана ар тараптуу кароону камсыздоого чакырышты жана Төрөбай Зулпукаровго «Кумтөр» маселеси боюнча күнөөсүз экенин далилдөөгө мүмкүнчүлүк берилиши керек деп эсептешет.
Эл өкүлдөрү шаардык соттун коллегиясынан депутаттын баш коргоо чарасын үй камагына алмаштырууну суранышты жана Төрөбай Зулпукаров сотко чейинки иликтөөгө, ошондой эле соттун териштирүүсүнө тоскоолдук жаратпашына, Кыргыз Республикасынын мыйзамдарын толук сактоосуна кепилдик беришти.
