11 жаштагы кызды бычак менен коркутуп, тоноду деген шек менен 27 жаштагы жаран кармалды. Бул тууралуу Панфилов районунун милиция кызматкерлери билдиришти.
Кечээ, 15-февраль күнү Панфилов райондук ички иштер башкармалыгына каракчылык фактысы боюнча билдирүү түшкөн. Ыкчам тергөө тобу айтылган дарекке баргандан кийин 11-февралда саат 14:00 чамасында Кайыңды шаарында жергиликтүү тургундун үйүнө медициналык бет кап кийген белгисиз адам киргендиги аныкталган.
Ошол учурда үйдө жашы жете элек төрт бала бар болгон. Анда шектүү 11 жаштагы кызды бычак менен коркутуп, акча жана баалуу буюмдар кайда сакталгандыгын көрсөтүүнү талап кылган. Андан кийин бөлмөдөгү капчыкты байкап, анын ичиндеги акчаны алып, андан кийин изин жашырып кеткен.
Ал мезгилде балдардын апасы үй-бүлөлүк маселелери боюнча башка жакта болгон.
Учурда аталган факты боюнча сотко чейинки өндүрүш иши башталды. Шектүү убактылуу кармоочу жайга киргизилип, тергөө иштери уланууда.
