ИИМдин Кылмыш иликтөө башкы башкармалыгынын кызматкерлери ыкчам аракеттери жүргүзүлүп, жарандарга Ош шаардык «Унаа» мекемесинен айдоочулук күбөлүк алып берүүгө убада кылып, акча алып жүргөн эки жаран кармалды.
Ыкчам-иликтөө учурунда “Телеграмм” тиркемесине айдоочулук күбөлүк алып беребиз деп жарнама киргизип, акча алып алдап жүргөн адамдар аныкталган. Апрель айынан бери аларга байланышка чыккан жарандарга айдоочулук күбөлүк алып берүү кызматтарын көрсөтөбүз деп ишеничке кирип, электрондук кошелок аркылуу акча жөнөттүрүп, бир нече адамды алдап кетишкен. Жүргүзүлгөн ыкчам иш-чаралардын натыйжасында аталган шылуундар Кара-Суу шаарынын тургундары 1990-жылы туулган Н.Н. жана 1997-жылы туулган С.М. аттуу жарандар экени такталып, Ош шаардык «Унаа» мекемесинин имаратынан акча алып жатышкан жеринен кармалышкан.
Шектүүлөр Ош ШИИБтин тергөө кызматына жеткирилип, учурда беш жарандан алдоо жолу менен ар кандай өлчөмдөгү акча алышканы, келтирилген зыяндын жалпы суммасы 95 миң сомго барабар экени аныкталган. Аталган факты боюнча 209-берене менен кылмыш иши козголгон. Учурда шектүүлөрдүн башка кылмыштарга катышы бар экендигин аныктоо боюнча тергөө иштери жүргүзүлүүдө.
