АКШдан алып, Кыргызстан аркылуу Орусияга курал сатып жүргөн топтун иши токтотулду. Бул тууралуу УКМК билдирди.
АКШдан сатып алып, Кыргызстан аркылуу Орусия багыты боюнча ок атуучу курал-жарактарды контрабандалоонун туруктуу каналын уюштурган трансулуттук уюшкан кылмыштуу топтун иши токтотулду. Алар 2022-жылдын апрелинен тартып азыркы учурга чейин «Глок», «CZ», “SIG SAUER” үлгүсүндөгү тапанчаларды, «АР-15», «SIG SAUER» 5,56-223 мм калибриндеги автоматтарды, «Беннели» мылтыктарын жана алардын ок-дарыларын мыйзамсыз ташуунун жана сатуунун эл аралык каналын уюштурушкан.
«Кыргыз жараны С.М.М. жана башка адамдар АКШнын аймагында өндүрүшчүлөрдүн интернет сайттарынан ок атуучу куралдарды сатып алып, аларды ар кандай видео аппаратурага жамынып, жашыруун жерлерге катышып, почта аркылуу Кыргызстанга алып барышып, ал жерде негизги бөлүктөрүнөн ок атуучу куралды колдонууга даяр комплект түзүп, андан ары мыйзамсыз сатуу үчүн Орусияга жөнөтүп турушкан», — деп жазылат УКМКнын маалыматтында.
Маалыматка ылайык, 2022-жылдан тартып азыркы учурга чейин алар тарабынан Кыргызстан аркылуу Орусияга 300дөн ашык ок атуучу курал жөнөтүлүп турган. Мында крим чөйрөнүн өкүлдөрү негизги кардарлар болуп саналышкан. Ушул жылдын 23-январында АКШдан кезектеги партияны алып жаткан учурда С.М.М. кармалып, мыйзамсыз жүгүртүүдөн 5,56-223 мм калибрдеги күжүрмөн автоматтын эки стволу жана Глок-34 үлгүсүндөгү ок атуучу куралдын стволу алынган. Шектүү 25-январда УКМКнын тергөө абагына камакка алынды.
Учурда окуяга тиешеси бар башка адамдарды аныктоо иштери жүрүп жатат.
