2024-жылдын 30-ноябрында Чүй облустук ички иштер башкы башкармалыгынын Тергөө кызматына Ш.А.Ш. аттуу жаран арыз менен кайрылган. Анда А.А.А. аттуу жаран аны алдоо жолу менен ишенимине кирип, 3 даана “L7”, “L9” жана “BMW X5” үлгүсүндөгү автоунааларын Орусияга алып барып сатып берем деп ишендирип, кийинчерээк “BMW X5” автоунаасын 11 миллион рубль акчага сатып, калган “L7” жана “L9” автоунааларын Орусияда жайгашкан күрөөканага коюп, акчасын бербестен качып изин жашырып жүргөндүгүн билдирген. Бул тууралуу ИИМден кабарлашты.
Бул факты боюнча Чүй облусунун Ысык-Ата РИИБи тарабынан Кылмыш-жаза кодексинин 209-беренесинин 4-бөлүгүнүн (алдамчылык) менен кылмыш иши козголгон. Ыкчам-издөө иш-чараларынын жүрүшүндө ИИМдин Кылмыш иликтөө башкы башкармалыгынын ыкчам кызматкерлери тарабынан Ош облусунун Ноокат шаарынын тургуну, 1980-жылы туулган А.А.А. аттуу жаран кармалып, Тергөө кызматына жеткирилген. Ал кылмышка шектүү катары Чүй облусунун Ысык-Ата РИИБдин убактылуу кармоочу жайына киргизилген. Тергөө амалдары улантууда.
