18 жаштагы Станислав Ситниковдун “Алтын кум” эс алуу жайындагы аквапаркта каза болгондугу боюнча сотко чейинки өндүрүштүн материалдары сотко жөнөтүлдү. Бул тууралуу СЕРЕП МЕДИА маалымат агенттигине Ысык-Көл ОИИБден билдиришти.
Тергөөнүн версиясы боюнча, 1964-жылы туулган жеке ишкер «Алтын кум» эс алуу жайынан ижарага орун алган. 2002-жылы ал жерге «Анаконда», «Спринт» жана Гидро труда» сыяктуу аттракциондор менен аквапарк курган. Аттракциондун нормалдуу иштеши үчүн суунун тынымсыз агымы керек. Милициянын маалыматына караганда, насостук станция Ысык-Көлдүн жээгинен 12 метр алыстыкта жайгашкан. Түтүктүн милдети — диаметри 500 мм болгон металл түтүк аркылуу көлдөн суу аттракциондоруна сордуруу. Түтүк өзү Ысык-Көлдүн тереңинде, башкача айтканда, көзгө көрүнбөгөн жерде жайгашкан. Резервуардын темир түтүгүнө 8 насос орнотулуп, ал аркылуу көлдүн суусу аттракциондорго жеткирилет.
Укук коргоо органы белгилегендей, ишкер аттракциондорду суу менен камсыз кылуучу насостору бар аймак сууга түшүүгө тыюу салынган жана кооптуу аймак экенин билип туруп, тосмолорду, коопсуздук белгилерин орнотуу боюнча чараларды көргөн эмес. Жыйынтыгында керектөөчүлөрдүн өмүрүнө жана ден соолугуна коркунуч жаратып, суу-көңүл ачуу кызматтарын көрсөтүү менен өз ишмердүүлүгүн улантып жатканын кошумчалашты. Бирок ал ишин уланта берген.
Анын аттракциондору технологиялык документациянын жоктугуна карабай иштеген. Бул сертификаттар паспорт, орнотуу боюнча нускама, өндүрүүчүнүн эксплуатациялоо боюнча нускамасы жана долбоордук документтердин өнөр жайлык коопсуздук экспертизасынын корутундусу сыяктуу зарыл болгон коопсуздук чаралары болушу керек. Иликтөөнүн жүрүшүндө суу аттракционун эксплуатациялоодо аварияларды локалдаштыруу жана кесепеттерин жоюу, өндүрүштүк көзөмөл боюнча иш-чаралардын планы жок экендиги аныкталган.
27-июлда түштөн кийин Станислав Бостеридеги аквапарктын жанындагы пляжда сүзүп жүргөн. Саат үч жарым чамасында ал 500 миллиметрлик темир түтүккө сорулган. Ал учурда көлдөн аттракциондорго суу айдап жаткан. Натыйжада жигит ошол жерден каза болгон. Соттук-медициналык экспертизанын корутундусуна ылайык, Станиславдын өлүмү механикалык асфиксиядан, жогорку дем алуу жолдорунун суу менен жабылышынан, башкача айтканда, тумчуккандан болгон.
